Кезектеги тыюу. Жарандар тартип сакчылары мыйзам бузуп жатса дагы видеого тарта албай калабы?

Парламентте милиция кызматкерлерин видеого тартууга тыюу салган мыйзам долбоору даярдалды.

2024-жылдын 16-сентябрында Жогорку Кеңештин сайтында «Кыргыз Республикасынын айрым мыйзам актыларына өзгөртүүлөрдү киргизүү жөнүндө (Кыргыз Республикасынын Кылмыш-жаза кодексине, Кыргыз Республикасынын Укук бузуулар жөнүндө кодексине)» Мыйзамдын долбоору каттоого алынды. Ага ылайык, ички иштер органдарынын кызматкерлерин фото, видеого тартууга жана жаманатты кылып каралоо максатында социалдык тармактарга таратууга тыюу салынат. Демилгечилер:  Сүйүн Өмүрзаков, Винера Раимбачаева, Алишер Эрбаев, Кундузбек Сулайманов жана Ырысбек Атажанов.

 Негиздеме-маалымкат

 Мыйзам долбоорунун негиздеме- маалымкатында коомчулукта укук коргоо органдарынын кызматкерлерине баш ийбөө, каршылык көрсөтүү, мазактоо, кемсинтүү, ошондой эле өз милдеттерин аткаруу учурунда алардын ишине мыйзамсыз кийлигишүү, өз алдынча фото жана видеого тартып, жаманатты кылып каралоо максатында социалдык тармактарга таратуу фактылары көбөйгөндүгү жазылган.  

 Мындан тышкары, демилгечилер бир гана милиция кызматкерлерине эмес өзүнүн кызматтык, кесиптик ишин же коомдук милдетин аткарып жаткан адамга (тез жардамдын кызматкерлерине, дарыгерлерге, мугалимдерге, жергиликтүү бийликтин өкүлдөрүнө ж.б.) карата жасалган бейбаштык фактылар көп. Анын кесепетинен муктаж болгон жарандарга өз убагында тиешелүү жардам көрсөтүлбөй, өз милдеттерин убагында аткарууга жолтоо болуп, оор жана өзгөчө оор зыянга алып келиши мүмкүн деп белгилешкен.

Депутаттардын сунушу

Мыйзам долбооруна ылайык, милиция кызматкерине баш ийбей, болуп жаткан окуянын баарын видеого тартып, аны социалдык тармакка жаманатты кылуу максатында тараткандар 5 миң сом айыпка жыгылат же 5-7 суткага камалат.

Кандай тобокелчиликтер бар?

Депутаттардын мындай демилгеси тартип сактоо органдарынын кызматкерлерин коргогону менен жарандарды милиция кызматкерлери тарабынан жасалган мыйзамсыз аракеттерин видеого түшүрүү укугунан ажыратат. Документ колдоо тапса, жарандар өз чындыгын далилдөө мүмкүнчүлүгүнөн кол жуушу ыктымал.