Жогорку Кеңеш Элдик курултай тууралуу мыйзам долбоорун четке какты

Элдик курултайдын делегаттарынын ыйгарым укуктарын көбөйтүү каралган мыйзам долбоору парламенттин жалпы отурумунда биринчи окууда четке кагылды.

Депутаттар бул маселени талкууга дагы алган жок.

Эл өкүлү Исхак Масалиевдин айтымында, делегаттардын укуктарын көбөйтүүнүн кереги жок.

“Мыйзам чыгаруучу демилге элдик курултайда бар, улуттук кенеште жок. Бул жерде толугу менен Жогорку Кеңештин функциясын кайталап жатат. Эгер мыйзам кабыл алынса парламентти таркатып, ишти токтотуш керек. Элдик курултайдын делегаттарына мыйзам кабыл алуу, процескке катышуу,  көзөмөлдөө, жооп алуу, элдин атынан сүйлөө деген укуктарды берсек парламенттен эмне айырмасы болот? Бир аз шашылыш болуп жатат”, — деди Масалиев.

Депутаттар Камила Талиева менен Надира Нарматова мыйзам долбоору опурталдуу экенин айтып, талкуусуз эле добушка коюну сунушташты.

“Курултай тууралуу мыйзам жаңы эле кабыл алынган, бир жыл боло элек. Кыргыздарга бийлик эле керек экен, долбоорду окуп көрсөм пайдалуу эчтеке жок. Бир гана бийлик талашуу болуп калыптыр”, — деди Нарматова.

Добуш берүүнүн жыйынтыгында элдик курултай тууралуу мыйзам долбоору четке кагылды.