Депутат: Centerra 2011-жылы Кыргызстандагы президенттик шайлоого таасир эткен

Анын айтымында, 2011-2012 жылдары Centerra тарабынан бөлүнгөн демөөрчүлүк каражаттары бюджеттик жана мамлекеттик сатып алуулар мыйзамдарын бузуу менен казына тутумунан тышкары пайдаланылган. Ошол себептен мамлекеттик органдардын чыгымдарды көзөмөлдөө мүмкүнчүлүгү болгон эмес.

2011-жылдын сентябрь айында $ 10 млн өлчөмүндөгү демөөрчүлүк каражат «РСК Банктагы» Турак жай жана жарандык курулуш департаментинин эсептик эсебине которулуп, казына тутумунан тышкары колдонулуп жатат. Ушул каражаттын эсебинен курулуп жаткан курулуш объектилеринин тизмеси премьер-министр Алмазбек Атамбаев тарабынан 2011-жылдын 13- жана 23-сентябрында шайлоо алдындагы үгүт учурунда жана 2011-жылдын сентябрь-октябрь айларында Кыргызстандагы президенттик шайлоонун алдында бекитилген.

«Башкача айтканда, Centerra саясий процесстерге орой кийлигишип, биздин өлкөнүн президенттеринин тандоосуна таасирин тийгизди. Ошол кездеги курулуш объектилеринин тизмесин Каржы министри жана Жогорку Кеңеш бекитиш керек болчу, иш жүзүндө андай болгон эмес»,- деп Жапаров билдирди.